یه‌كه‌م ئه‌ڵقه‌ی خه‌رمانه‌ له‌ بابه‌تی ڕووبه‌ڕووبوونه‌وه‌ له‌گه‌ڵ خوددا (٣)

هه‌نووكه‌ نۆره‌ی حه‌زره‌تی عوسمانی زیننوره‌ینه‌ له‌ خه‌رمانه‌كه‌دا كه‌ نووری ڕه‌حمان وه‌ك خۆر له‌ سیمایدا ده‌دره‌وشێته‌وه‌. ئه‌مه‌ی خواره‌وه‌ چه‌ند دڵۆپێكه‌ -سه‌ره‌ڕای نزمیی ئاستی وه‌فای ده‌ربرینی من- له‌ ڕه‌فتار، بیر، قووڵی ناوه‌كی و هه‌ندێك له‌ ئاخ و داخه‌كانی كه‌ هاوشێوه‌ی ئه‌وانی پێش خۆی له‌ ده‌نگی ڕابه‌ر و پێغه‌مبه‌ره‌كه‌یان ده‌چێت.

له‌ دونیای بیر و هه‌ستی حه‌زره‌تی عوسماندا، هه‌میشه‌ ئه‌و شته‌ی كه‌ وه‌ك نه‌ی ده‌نگی ده‌دایه‌وه‌، ئه‌و نركه‌ و ناڵه‌ و نه‌غمانه‌ بوون كه‌ به‌درێژایی 25 ساڵ له‌ حه‌زره‌تی موسته‌فاوه‌ بیستبوونی و، سپارده‌ی دڵ و ڕۆح و سیڕڕی كرابوون. ئه‌و، له‌ ترسی ئه‌وه‌ی نه‌وه‌ك خستنه‌سه‌ری زیاده‌یه‌ك بۆ ئه‌م شتانه‌ كه‌وسه‌ری گوفتاره‌كانی حه‌زره‌تی لێڵ بكات، له‌ بابه‌تی كڕووزانه‌وه‌ی له‌ ده‌رگانه‌ی حه‌قدا، ئه‌و ڕێیه‌ی هه‌ڵبژارد كه‌ هه‌مان به‌سته‌كانی سه‌روه‌ره‌كه‌ی به‌كاربهێنێت. هاوڕێ له‌گه‌ڵ هه‌ستی ڕاسگۆیی و وه‌فاداریدا، به‌ گوفته‌ و به‌سته‌یه‌وه‌ ته‌نها ئه‌و شتانه‌ی ده‌وت كه‌ ئه‌و فه‌رموونی.

نه‌خشه‌ی بیر و هه‌سته‌كانی ڕێك وه‌ك سه‌له‌فه‌كانی وابوو. چاوی بڕیبووه‌ چاوی ڕێنماكه‌ی، گوێی تینووی ئه‌و شتانه‌ بوو كه‌ له‌وه‌وه‌ دێن؛ دوعا و نیاز و پاڕانه‌وه‌ و لاڵانه‌وه‌كانی هه‌میشه‌ له‌ چوارچێوه‌ی ئه‌و شتانه‌دا مانه‌وه‌ كه‌ ڕابه‌ره‌كه‌ی كردبووی و گوتبووی. ئه‌ده‌ب و شه‌رمه‌كه‌ی وه‌كو ناونیشانی ئه‌ویان لێ هاتبوو. له‌ هه‌ستان و دانیشتنیدا ته‌نها ئه‌و شتانه‌ی به‌ بناغه‌ وه‌رده‌گرت كه‌ له‌ حه‌زره‌ته‌وه‌ ده‌چۆڕاون؛ هاوڕێ له‌گه‌ڵ ته‌سلیمییه‌تی “ئه‌و شتانه‌ی پێویست بێت بوترێن ئه‌و فه‌رموویه‌تی. ته‌نها ئه‌وه‌ بۆ من ماوه‌ته‌وه‌ كه‌ بیانكه‌مه‌ ویردی سه‌ر زمانم”، هه‌میشه‌ ڕێزێكی زۆری له‌وانی پێش خۆی ناوه‌ و، ڕه‌فتاری پێچه‌وانه‌ی ئه‌مه‌ی به‌ لادان ئه‌ژماكردووه‌. به‌ڕواڵه‌ت وا ده‌رده‌كه‌وێت كه‌ نه‌یناڵاندبێت و نه‌كڕووزابێته‌وه‌ و ڕووبه‌ڕووی نه‌فسی خۆی نه‌بووبێته‌وه‌، به‌ڵام خه‌ڵوه‌تییانه‌ ده‌ژیا و، له‌وانه‌یشه‌ یه‌كه‌م پیری خه‌ڵوه‌تییه‌كان ئه‌و بێت…

ئه‌و و سه‌له‌فه‌كانی، مانه‌ندی هه‌ستیاری و جددییه‌تی زێڕه‌نگه‌رێك، به‌ وردبینی به‌سیره‌ت به‌جۆرێك شوێنی حه‌زره‌تی پێغه‌مبه‌ری كه‌وتبوون كه‌ گوفته‌ یه‌ك، به‌سته‌ یه‌ك و نه‌غمه‌شیان یه‌ك بوو. سوڵتانی گوفتار (ص) چۆن به‌ گوته‌ تایبه‌ته‌كانی ناڵاندوویه‌تی، نه‌غمه‌كانی حه‌زره‌تی عوسمانیش -جگه‌ له‌ جیاوازیی ده‌نگ- هه‌مان شت بوون؛ چونكه‌ ئه‌وان له‌ حوكمی كۆمه‌ڵێك ئاوێنه‌ی نوورانیدا بوون كه‌ له‌ خه‌رمانه‌ی چوارده‌وری “مانگی تابان”دا هه‌موو شتێك وه‌ك خۆی تیایاندا ڕه‌نگی ده‌دایه‌وه‌. بۆیه‌ له‌ بابه‌تی ڕووكردنه‌ خوا، هه‌ڵڕشتنی ناخ بۆی و ده‌سته‌ویه‌خه‌بوون له‌گه‌ڵ نه‌فسدا هه‌میشه‌ ئه‌و ئارگومێنتانه‌یان به‌كارده‌هێنا كه‌ ڕابه‌ری پایه‌به‌رز گوزارشتی لێوه‌ كردبوون؛ زۆربه‌ی كاتیش به‌ هه‌مان مه‌قام و ڕیتم ناخی خۆیان بۆ حه‌زره‌تی حه‌ننان و مه‌ننان هه‌ڵده‌ڕشت. له‌ بابه‌تی پاڕانه‌وه‌ و لاڵانه‌وه‌ له‌ خوادا، ده‌ترسان له‌وه‌ی پێچه‌وانه‌ی گوفتار و كرداره‌كانی “سوڵتانی ئه‌ده‌ب” بجووڵێنه‌وه‌ و، له‌ هه‌موو حاڵێكیاندا ئه‌وپه‌ڕی هه‌ستیارییان ده‌نواند بۆ ئه‌وه‌ی زمانی “ئه‌و” به‌كاربهێنن.

حه‌زره‌تی خاوه‌نی دوو نوور، له‌ ده‌ره‌نجامی ناسكیی ڕۆح، ئه‌ده‌ب و شه‌رمه‌ فراوانه‌كه‌ی و، نزیكیی خزمایه‌تییه‌كه‌ی، كۆمه‌ڵێك واریداتی ده‌ست كه‌وتبوو كه‌ هه‌میشه‌ له‌ناویاندا ده‌ژیا؛ بۆیه‌ له‌ناو گوفتار، ڕه‌فتار و دوعاكانی سه‌رداره‌كه‌یدا هه‌ناسه‌ی ده‌دا. له‌پاڵ هه‌موو ئه‌مانه‌دا، به‌ بانگه‌كانی “یا، یا…” ده‌ستی له‌ قوڵفی ده‌رگای “بانگكراوی موقه‌دده‌س” ده‌دا؛ به‌ نركه‌ی “یا من” و وتنی () عه‌رزی حاڵی خۆی ده‌كرد و ناخی خۆی هه‌ڵده‌ڕشت. له‌م ناخ هه‌ڵڕشتنه‌یدا قورئانی كردبوو به‌ بناغه‌ و وه‌سیله‌ی خۆی. ئه‌وه‌ بوو به‌ (المعوذتین) خاڵی كۆتایی گه‌شتی خۆی له‌ ئاسۆی گوفتاری ئیلاهیدا دانا؛ هه‌تا ئه‌و كاته‌ش كه‌ هه‌ندێك له‌ به‌دبه‌ختان بوون به‌ هۆكاری ئه‌وه‌ی كه‌ ڕۆحی به‌ره‌و جیهانی غه‌یب بفڕێت، زمانی له‌سه‌ر ویردی خۆی به‌رده‌وام بوو. خوێنه‌كه‌ی كه‌ ڕژایه‌ سه‌ر قورئانی پیرۆز، ڕاستگۆترین شایه‌ته‌ له‌سه‌ر په‌یوه‌ندیی قووڵ و به‌تینی ئه‌و به‌ گوفتاری ئیلاهییه‌وه‌. ئه‌و هه‌میشه‌ له‌گه‌ڵ قورئاندا چاوی ده‌كرده‌وه‌ و داده‌خست، گوفتاری خواییش بۆ دوایین جار چاوه‌كانی ئه‌وی به‌ ڕووی دونیادا داخست.

خوای گه‌وره‌، ڕۆحی قورئان به‌ته‌واوه‌تی بدات به‌ گوێی به‌دبه‌ختانی ئه‌م ڕۆژگاره‌شماندا كه‌ هه‌رچه‌نده‌ قورئان به‌ ده‌ستیانه‌وه‌یه‌ به‌ڵام دڵیان له‌ دونیا و شتانی ناوی پڕه‌؛ له‌ پێگه‌ی “وه‌ستای ده‌نگ و قوڕگ” ڕزگاریان بكات و، بۆ ئاسۆی ژیانی دڵ و ڕۆح به‌رزیان بكاته‌وه‌!

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *